雖然說還有Day 9，但其實我是早上８：４５的飛機，所以其實跟沒有一樣的。就放在一起寫啦。
一早起來，其實大約由６點左右至８點這段時間，我都是醒下又訓下，因為其他房客都在收拾行裝Check Out，到我真正起床，我估大約８點多的時間，除了那兩位香港朋友，其他的都已經不見，有一些Check-Out，有一些就已經出去觀光，真係有無咁早呀？
見兩位香港朋友還在睡，我便先去沖個涼，再刷個牙，洗個臉，才看到他們起床。而我就先收拾行裝，因為我也要準備退房，咁今晚訓邊？登登登，訓機場是也！其實訓機場幾辛苦的，所以勸大家都是不要亂訓機場。以我訓了幾次機場的經驗，基本上你係訓唔到，除非你完全無戒心又或者係超級放心，唔係既話你總會驚你既行李俾人偷左。但如果真係要訓，有一個訓機場指南，可以俾大家參考下。
The Guide to Sleeping in Airport
裡面有齊全世界各大機場既訓機場指南同用家評論，當然有啲好細既機場無得訓啦。但我覺得係幾全面的。可以一戰。
收拾好行李，兩位香港朋友就話去附近的一間食蛋好出名既鋪頭食早餐，叫Eggs'n Things，我就當然跟住去啦，行左兩個街口，轉左個灣，就到啦！已經有人排緊隊，不過排隊時可以先睇餐牌，諗定食乜，其實條隊都係得大約十個人係我前面，唔駛１５分鍾就到我地三個人啦。入到去，店員既打扮都好有夏威夷風情，因為鋪頭係來自夏威夷？？
我地三個都各自揀左不同既Omelette，其實個奄列都係一種菜類，如蕃茄或蘑菇，加一種肉，如火腿再加一種芝士，三種材料合埋，然後佢仲有牛油薯仔附上，係一份勁量早餐！一份大約係１０００羊至１２００羊左右，唔算平。落左單，大約等左十分鍾就有得食啦！一上枱既時候，真係估唔到煎得咁靚仔，一個半月形既奄列，再加半碟既薯仔。然後自己再加茄汁，就唔客氣啦！食落，學食評人話齋，蛋有蛋味，真係好好正。芝士加蕃茄又係絕配，絕對係值得食既。其實佢仲有其他野食，有甜品，有特式飲品，不過我地志在食蛋就無試到其他野啦！
食完個奄列，其實已經飽左大半，食埋薯仔，真係Full到上心口，結果今日我連午餐都唔駛食，直接食晚餐。
美味的Omelette
食完個非常滿足既早餐，又係時候去Shopping下啦！先去梅田行下最新商場GFO，GFO係梅田最新既商場，入面亦都有唔少既鋪頭賣衫褲鞋，不過價位比天王寺既高檔少少，結果我都係得個行字，無落手買。
行完GFO，我就又搭車返天王寺，去返尋日睇中背包既鋪頭，買左佢！價錢，一個字，貴！
之後，就返Hostel，拎行李，準備出發去機場囉！係我準備離開Hostel既時候，Hostel職員主動邀請我影張相，原來佢地習慣同每位客人合照，然後放上FB！當然啦，用佢部機影完，就用我部機影下，留個紀念！
留個紀念！
影完相，就係時候背起大背包起程啦，先去坐地鐵到難波站，再由難波站轉車往機場！坐地鐵到難波，問了在售票機旁的姐姐，剛好特急往機場的列車開走了，唯有轉坐普通的快速列車吧，便宜一點但慢一點，不過總比等下一班特急來得快。
坐上普通列車，唯一不好的地方是無位坐，要企。下次有得揀還是坐特急比較好，有得坐。坐了大約５０分鍾，便已經到達機場了。重回機場，當然要先去找Locker寄存行李，咁就唔駛拎住行李周圍走，不過記得要夜晚１２點前拎返，唔係就會收多一日的費用。寄好行李，就先去郵局，拎返我漏係Yui屋企既充電器先！之後就落返去地下，準備坐穿梭巴士去位於泉佐野的Outlet，Rinku Premium Outlet。穿梭巴係要收費既，每程係一百蚊，而且係無行李架，所以唔好帶住行李去。當日我前面就有兩位華心旅客拎住大大件行李，最於搞到司機落車開車底行李架，但其實應該一般係唔會咁做的，所以各位請做個聰明的旅客啦。
到達Outlet，其實已經６點，即係我只得２個鍾係入面行！其實真係唔太夠，建議都至少預３粒鍾穩陣，我行左Nike，Adidas，Columbia，Levi's，Timberland等等，淨係係Timberland買左一對一萬羊既鞋，折返港紙750左右，都叫有平。 如果你買Levi's 咁就真係麻煩啲，因為要自己改褲腳。所以最好都係買鞋或衫比較好。
一直行到８點，關門同埋趕最後一班既穿梭巴返機場。再施施然，係機場入面既免稅店行下街，買下手信咁。記著，記得上網申請KIX關西機場果張會員卡，買野會有９折，同埋用Lounge既設施會有半價優惠，呢個優惠亦令我今晚較後時間有得訓下，因為最後我去左Lounge度訓。
回到機場，時間大約８點半，呢個時間當然先去醫肚啦，出境層那裡有一條食街，上一層商店街那裡也有不少選擇，找了一間吃日式吉列的食店進去吃，一個豐富的套餐才１０００羊，比香港平太多了吧？！還要是一樣任加菜絲跟白飯，嗚啊！肚餓食吉列就最好啦！
關西空港 快速列車
車箱內
好吃的吉列！
吃得飽飽，便出發，去Shopping啦，買了很多的手信，買完之後，才回去Locker那邊拿行李。再把行李好好的收拾在大背包之中。之後，就要找一個有充電的地方，準備好好休息了。
在出境層找了一排長椅，坐了大約兩個小時，睡不著亦不敢睡，想想覺得不是辦法，便試試去KIX Lounge看看裡面有沒有位子，可惜的是已經滿了。不過，還好我記得在日航酒店那一邊，有另一個Lounge，大約１２點多１點的時候，我就過去碰碰運氣吧！
櫃台的是一個年青的男子，我先用英語交談，但原來他識講普通話，睇黎大陸去日本留學的學生都幾多，他說可以訓低既位已經無曬，得返啲可以較既皮椅位，我就話都好啦，好過無。Lounge入面無厠所，亦無涼沖，厠所要出返去用機場既。每個位會用好似辦公室既板隔開，燈光亦較到好暗，叫有一點私人空間。每個位有插頭，可以充電。Lounge入面汽水機，茶咖啡任飲，我都飲左好多杯汽水，賺返，哈哈。不過相比起黎，都係KIX Lounge好啲，有得俾錢沖涼，亦有電腦用，叫無咁悶，不過我都係用黎休息同訓，叫做有得訓返幾粒鍾啦。
訓下訓下，訓到四點幾五點，左右隔離既人，因要搭早班機開始有點聲浪，令我訓下醒下。
一直到６點，好啦我都要準備上機。先去厠所爆個靚石，刷個牙洗個臉，拎條毛巾抹抹身，就落去巴士站，搭車到T2準備Check-in。
Check-in都係無乜大問題，入到禁區，發現原來入面都有鋪頭，仲要免稅，早知就唔需要係外面買手信，買左支日本威士忌，坐一陣，就到８：４５，上機返香港啦！
飛機度，因為未食早餐，就叫左份野食，點知就好似兒童餐！中伏！不過味道尚可啦，Peach的機好新，但未至於好舒服，唯一亮點係日本空姐，哈哈。
黎到呢度，我既９日日本之旅終於完結啦，呢９日入面，走訪左日本較少人去既地方，亦試左我人生第一次Couchsufing，去左國家地質公園，搭左好多次火車。日本真係一個非常先進既國家，自由行完全無難度，問路問人亦都無問題，因為唔識英文既日本人都會盡力去幫你的。可能呢啲就係民族既教養啦！有機會的話，下次我會想去日本既中國地區或者北陸地區，睇下有無機會啦。
Lounge入面，張椅可以較低都接近平躺，都叫舒服既。但實際其實無咁光，只係電話感光高。
汽水機，茶機，咖啡機，仲有朱古力等等各種飲品。
T2禁區內
上機啦！
中伏兒童餐！味道尚可！
沒有留言:
發佈留言