柬埔寨 - 吳哥窟之旅

柬埔寨 - 吳哥窟之旅
（７／２０１４）

這次旅程開始之前，其實無計劃會去柬埔寨。應該話，一直我都揸唔定主意去邊。只係知道需要出走一下，休息一下。咁岩，見到國泰Fanfares，有特價。有台灣（又去台灣），有日本（又係日本？），有大陸（唔想返大陸），咁岩我就見到有多一個選擇，金邊。咦，金邊，咪即係柬埔寨，試下都好喎。　

查了一下機票，來回唔駛＄１５００，港龍機，抵！時間方面，早機去早機返，尚算可以，其中一個選擇係留５日，都符合要求！好，一於就問下上個月去完既朋友先！Whatsapp佢，問佢柬埔寨自由行係咪好OK？（抱歉我仲以為柬埔寨好落後）佢就話非常OK！自由行無問題，而且吳哥窟係世界文化遺產，值得一去！就係咁，我就決定左，呢個柬埔寨 - 吳哥窟之旅落實！

港龍機，因為Fanfares關係來回只需＄１５００

今次柬埔寨之旅，主力我係遊覽吳哥窟，５日有３晚住暹粒既酒店，一晚訓夜行巴士，所以雖然係飛金邊，但實際上金邊我淨係去過巴士公司同機場。由於早機去加轉巴士既關係，實際我既行動時間其實係三日，不過都足夠去睇吳哥窟了。以下就係簡單行程，比大家參考下。　

Day 1 : 香港 -> 金邊 -> 暹粒
Day 2 : 暹粒 - 小吳哥之旅
Day 3 : 暹粒 - 大吳哥之旅
Day 4 : SPA - 暹粒 -> 金邊
Day 5 : 金邊 -> 香港

本來係諗住Day 4 早上坐大巴，下午回到金邊，入住YHA，然後第二早再慢慢起身搭車去機場，但後來我發覺原來有夜行巴士可以慳一晚，所以最後揀左搭夜行巴士。不過，就係咁我失算了，結果留多左一日係暹粒，因預算關係最後一日就Hea左就算，真係失策。

不過點都好啦，呢次自由行之旅其實都幾Hea，如果你係追求極多活動，玩，夜生活，Shopping的話。對唔住，柬埔寨真係唔岩你，返去你既日本或者韓國啦。但如果你想知道呢個國家既歷史多一啲，睇下世界文化遺產有幾正，用便宜的價錢享受高級酒店既設施去Relax下，我就會推薦你去柬埔寨啦。　

我住既三星酒店泳池，不過唔知係水唔太乾淨，飲左幾啖個肚就有啲唔舒服！

當然，旅行一定要講到錢，幾錢先駛費？我可以講，你唔豪，好似我咁既話，４０００港紙已經全包。如果你係兩個人去，分分鍾３５００都可以。當然，如果你揀一間靚啲既酒店，買唔到平機票，食又豪啲，手信又買多啲，我諗每人預鬆啲就６０００港紙啦。但換黎既係五星級既酒店享受，抵唔抵就見人見智啦。Backpacker有佢既玩法，豪客又有佢既玩法，悉隨尊便。　

再講多啲，之前好多人會覺得柬埔寨未開發，好落後。的確，柬埔寨既某啲地區，例如市郊，係好落後下。城市一般會先進多少少，但衛生情況一樣唔太好，只有遊客區先會好啲。水就緊記唔好飲水喉水，一定要買樽裝水，唔放心既就買外國貨。我咁多日都係飲樽裝水，不過有時餐廳俾既水我又會飲，但又無野喎，係咪好彩就唔知啦。

當然，如你想發揮一下你的慈善心，柬埔寨亦絕對係一個非常好的選擇。於２０１２年聯合國人類發展指數中，柬埔寨於１８６個國家或地區中排名１３８，與鄰居寮國位處同一位，對上一位是印度及赤道幾內亞（１３６），對下一位是不丹（１４０）。而對比香港，香港排１３位，第一位則是挪威。可見柬埔寨於世界上的國家是如何貧窮及落後，在我５日的旅程中，的確看到鄉郊地區是比較窮困的，遊客區滿滿是賣小東西的兒童。如果你有一些文具或糖果，在小孩的眼中是很受歡迎的。同樣地，柬埔寨作為發展中國家，農業依然是其主要的經濟。就像我我TukTuk司機，半年前他還是一個農民，後來來到暹粒讀大學才當起TukTuk司機。農業的不好處是受天氣影響，賺得的收入亦因重重剝削而顯得有限。

所以，如果你來的話，也不妨帶一些小禮物送給當地的小朋友，把快樂帶給他們。

柬埔寨，其實一個吳哥窟已經值得是必去的地方。以美麗的吳哥窟日出結尾，希望你也能夠到此一遊，趁還沒有太過城市化的時候，感受一下這個小而美麗的國家。　

日出的吳哥窟